|
二十世紀初的灣仔是一個華人聚居的社區，但它同時是英國殖民政府的軍事基地。訪問的過程發現，「英軍船塢」是灣仔老一輩口中的重要標記，老人家忽然來個"督yar"、"dogyar"等地道英語，指的是"Naval
Dockyard"。亦因為這個船塢，灣仔居民便要飽受多一重的戰火摧殘。
「四一年十二月八號之後嗰幾日啦，嘩！佢(日軍)本來炸呢個『海軍醫院』㗎，宜家『律敦治醫院』個位呀，佢話懷疑嗰處有軍火場喺度，燒咗彈呢'bomb'咗落去莊士敦道，『華懋大廈』嗰度，『華懋大廈』前身呢係叫做『牛津洋服』，咁呀戰後起咗『美高梅舞廳』，宜家『華懋大廈』拆三次。咁嗰陣時我哋(灣仔消防局)喺對面騎樓疏散吖嘛，喺『宏興鵲鴣菜』呀，同埋呢個『悅興包辦館』嗰處吖嘛，『雲長餐廳』吖嘛，嘩！我哋個個扒喺處，'bing
ling bang lang'，嘩！收尾有驚無險，個彈喺『牛津洋服』入便爆炸，死咗一個人！」
「喺灣仔另一次又係驚險，當時英軍派救濟米呀，好多人輪米呀，喺『宏興鵲鴣菜』，同埋『悅興包辦館』嗰處，即係宜家『大有商場』呀，嗰度係舖頭嚟，騎樓底無建到防空牆，變咗無嘢擋住，炸彈喺出便馬路邊爆炸，好多人瞓喺地呀，嗌救命呀。嗰啲霹擊炮彈喺出面馬路'bomb'咁'bomb'落去喎，好在大難不死，喺個耳仔'bang'一聲響呢，響到呢'wung'到宜家幾十年，成日'we'喺個耳窿嚟，震盪嗰啲耳骨。」
「防空牆係一舊大磚，四方嘅，入便井字形嘅，即係兩個通心磚嚟嘅，係紅毛泥沙石，一隻百二呎咁，四四方方砌上去個騎樓處，鋪坎個騎樓，即係好似宜家啲圍牆隔水咁，預備炸彈㗎喇。」
(灣仔消防員，講述兩次遇上炸彈的經歷)
|
|
落在灣仔的一枚炸彈。山上的濃煙可能是日軍與殖民地守軍正進行一場激戰。 |
|
|
日軍轟炸北角油庫。據一位灣仔消防員憶述，當時烈火熊熊，濃煙滾滾，消防員可以做的是保護居民的完全。待油庫燒光後，烈火才逐漸熄滅。 |
「鵝頸橋嗰度，到咁上下和平嗰陣時呀，嗰啲飛機呢品字形咁樣囉，炸鵝頸橋，好多人喺度放假呀嘛，好多人喺嗰度行呀，買嘢食吖嘛，嘩！嗰啲飛機密密圓圓唔知點樣，品字樣，睇住佢落…落緊炸彈落嚟呀，咁咪死好多人囉，嗰度呀，一路死咗啲人呀，執一個禮拜都未曾執得晒呀。我啲姊妹呀，嗰啲人去嗰度玩吖嘛，嗰度好旺吖嘛。都死咗好多個，嗰啲同埋一齊返工嘅姊妹。唉！真係好慘，蘿蔔頭嗰陣時。」
(灣仔女居民，淪陷時約20歲，當時在灣仔一家船當女工)
「一響警報呢，就...你有地方你就匿，有啲就去嗰啲防空洞，有啲呢就真係…就真係搵地方匿喇。試過一次我…最深印象呢，嗰日呢，就係地顫式轟炸。佢本來就炸嗰個船塢嘅，但呢係可能即係嗰時計算冇咁準啦，就變咗呢，全個灣仔呢，炸咗灣仔，咁呀地顫式你知道啦一路掃過去。警報
… 完咗之後呢，話嗰啲飛機走晒喇咁，咁呀聽到人哋話呢灣仔呢炸到…平晒。」
「咁我爸爸出咗去石印館吖嘛，喺聯發街，即係喺灣仔大佛口嗰度呢左近，我媽媽就即刻帶住我呢，嗰陣時又冇車又冇剩，我哋要由天樂里行路過去。嘩!沿途呢就真係驚心動魄呀，通街都係嗰啲瓦礫啦，嗰啲灰塵啦，行到去即係宜家修頓球場嗰度呢，嘩!嗰啲嗰啲屍體呢…即係支離破碎嗰啲屍體呢，直情好似…好話唔好聽…撈過泥嘅，即係…一截一截嘅，睇見就驚㗎喇。」
「嗰陣媽媽拖住我就…左閃右避，跟住電車路咁就行埋去嗰啲騎樓底嗰度呢再行，咁但係呢又驚呀，你騎樓底唔知穩唔穩陣㗎嘛，因為你炸過呢，好可能隨時冧㗎嘛，就又行番出嚟路邊，就跟住嗰啲人一路係咁行，卒之去到聯發街口嗰度呢，嘩一個大窿呀，嗰度有個炸彈炸咗落去呢，咁呀變咗一個大窿，雖然係年紀輕咋，直情好似跌咗咁㗎個心，即係驚呀。」
「石印館裡面就冇事…嗰…個屋冇冧到。嗌啦，嗌咗一輪先至有人應，原來呢佢哋匿埋晒喺嗰個…
即係用嗰啲石板呀，即係嗰陣時用嗰啲佢…佢石印就要…一一塊塊嗰啲石板咁㗎嘛，砌成一個防空洞咁，佢哋自製嘅防空洞，嗰啲石板呢好大塊㗎，一路咁㨆高呢佢哋原來匿晒喺裡面。」
(灣仔居民，淪陷時約十歲)
 |
「大佛口」是老人家口中的灣仔標記，指軒尼詩道與莊士敦道交界的位置。「大佛口」之名的來源說法不一，不過，「大佛口」是灣仔西面的起點，是共同的理解。 |
 |
香港淪陷時日軍佔據了英軍船塢，英軍則被囚禁於戰犯集中營。圖為1946年的英軍船塢門外，門外的日本文字意為「增田部隊」。 |
^top
|
